Justizia euskalduntzeko dekretua atzera bota dute epaileek

EAEko Auzitegi Nagusiko Administrazioarekiko Auzietarako Salak indargabetu egin ditu Justizia euskalduntzeko Juan Jose Ibarretxeren Gobernuak sortu zuen dekretuaren artikulu garrantzitsu batzuk.

Justizia administrazioko 2.000 langietako 800 hamar urtetan euskaraz mintzatzeko gai izatea zen dekretuaren helburua.

Epaian, auzitegiak adierazi du Euskadiko Gobernuak ezin dituela hizkuntza eskakizun orokorrak ezarri lantalde osoan, baizik eta lanpostu batzuetan baino ez. Halaber, idatzizko komunikazioak eta jakinarazpenak elebidunak izateko beharra ere indargabetu du.

Horrenbestez, epaileek onartu egin du partzialki Estatuko abokatuak aurkeztutako helegitea.

Ana Isabel Rodrigo, Angel Ruiz eta Luis Angel Garrido Bengoetxea epaileen ustez, Euskadiko bulego judizialek ez dute zertan unitate elebidunak izan izapideak egiteko. Gainera, hizkuntza eskakizuna duten lanpostuak eskualdearen euskaldun kopuruaren araberakoak izatea ere errefusatu dute.

Horren ildotik, auzitegiak gogorarazi du Jaurlaritzak ezin dituela legeak egin Justiziaren inguruan, eskuduntza "Estatuarena" baita.

Epaiaren aurka helegitea aurkez daiteke.

Lopezen Gobernuak dekretu berria egingo du

Epaiaren berri izan eta gero, Idoia Mendia Eusko Jaurlaritzako Justizia sailburuak iragarri du bere Exekutiboak dekretu berria egingo duela, Justizia Administrazioa euskalduntzeko helburuz.

ETBn egindako elkarrizketa batean, Mendiak azaldu du bere Saila helegitea aurkeztea aztertzen ari dela, eta aurreko Gobernuaren dekretuarekin "espirituarekin eta helburuarekin" ados dagoela.

Sailburuaren hitzetan, 2013 urtea arte Euskadin poliki-poliki ezarriko den bulego judizialarekin, Justizia modernizatu egingo dute, eta "prozesu judizial osoa euskaraz egitea" ahalbidetuko du.