Elkar liburu elektronikoak merkaturatzen hasi da

Elkar euskal liburudenda sareak "liburu elektronikoa" izeneko eragingailua merkaturatzen hasi da, mota honetako euskarriko liburuen irakurketa ahalbidetzen duena.

Liburudenda sarea irakurketa elektronikoko eragingailuak erosleen eskura jartzen dituen lehenengo enpresa da. Elkar sareko liburudendek Europako bi fabrikatzaileen liburu elektronikoak eskaintzen dituzte: zortzi hazbeteko iRex Technologies taldeko iLiad, eta sei hazbeteko Booken Cybook frantsesaren eragingailua.

Aktibazio-kodeak dituzten kupoi batzuen bitartez, irakurleek liburu gehiago deskargatu ahal izango dituzte. Kupoi bakoitzeko kodea erabiliz, eta Interneten bidez, hainbat idazle edo gai ezberdinetako liburuak deskargatzeko aukera egongo da.