Ekonomia

Eusko Jaurlaritzak, Confebask patronalak eta CCOO eta UGT sindikatuek abian jarri dute gaur Elkarrizketa Sozialaren Mahaia izenekoa, "lehenbailehen akordioak lortzeko asmoz", krisiaren "larritasuna" dela eta.

Gainera, "atea irekita" utzi diete ELAri eta LABi, mahaian parte hartzeari uko egin baitzioten.

Gaur Gasteizen lehen bilera egin eta gero, lehendakariak agerraldia egin du Miguel Lazpiur Confebaskeko presidentearekin, Unai Sordo CCOOko idazkari nagusiarekin eta Damaso Casado UGT-Euskadiko buruarekin batera.

Hedabideen aurrean egin duen agerraldian, Lopezek mahai honen nondik norakoak azaldu ditu. Besteak beste, prozesua bi maila ezberdinetan egingo dutela: batetik mahai orokor batetan (bertan goi-kargudunak bilduko dira); eta bestetik, hiru mahai sektorial ezberdinetan (Lana eta Gizarte Politika, Lan Osasuna eta Enplegua eta Politika aktiboak).

Mahai nagusiak bere lehenengo bilera egingo du datorren astean, "lehenbailehen hitzarmenak lortzeko borondate irmoarekin".

Gaur, bileran parte hartu dutenek, elkarrizketa sozialerako oinarriak adostu dituzte. Berehala martxan jarriko dute organo berria, eta behin-behinekoa izango da. Beraz, elkarrizketa soziala ez dute krisia dagoen bitartean bakarrik mantenduko.

ELA eta LABi buruz, Lopezek esan du elakrrizketa soziala "oso gauza serioa" dela eta sindikatu horiek parte hartu nahi badute, prozesu osoan egon beharko direla, ez mahai batzuetan bakarrik.