Ekonomia

Espainiako Gobernuak Garoñako Andra Mari (Burgos) zentral nuklearraren eragin esparrua berriz industrializatzeko programa jarriko du martxan urritik aurrera. Horretarako 25 milioi euroko inbertsioa aurreikusi du 2010. urtean, Miguel Sebastian Industria, Turismo eta Merkataritza ministroak gaur ezagutzera eman duenez.

Sebastianek Kongresuko Industria, Turismo eta Merkataritza Batzordeko kideei azaldu dienez, zentral nuklearraren ingururako neurri honek bat egingo du Espainiako beste eskualde batzuetan dagoeneko martxan dauden antzeko deialdiekin, besteak beste, Campo de Gibraltar, Teruel edo Cadizeko Badiarenak.

2010-2013 urte bitarterako 100 milioi euroko inbertsioa aurreikusi dutela adierazi du Sebastianek. Horietatik 24 milioi itzuli behar ez diren diru-laguntzei dagokie eta beste guztiak interesik gabe itzuli beharrekoak aurrerapenak dira.

Hala, Garoña inguruko ekonomian eragina txikitzeko asmoa duen deialdiaren informazio eta hedapen kanpainari datorren irailean ekingo zaiola gaineratu du. Gobernuaren asmoa onartutako proiektuen eta emandako laguntzen zerrenda 2010eko otsailean argitaratzea da.

Sebastianen esanetan, lehentasuna izango dute honako ezaugarriak dituzten ekimen industrialek: izaera produktibokoak, enplegua sortzen dutenak, enpresen garapenerako indartzaileak direnak, eduki teknologiko handikoak, enpresa mailan eremuaren erakargarritasun handituko duen kalitatezko zoru industrial lehiakorra lortzea helburu dutenak eta, irabazi asmorik gabe, enpresa txiki eta ertainen produktibitatea hobetzeko konponbide teknologikoak eskaintzen dituztenak.

Era berean, Gobernuaren erabakiak energia nuklearra, orokorrean, ez duela zalantzan jartzen argitu du, baizik eta "kasu zehatz bat eta, baldintza teknikoak, ekonomikoak eta energetikoak kontuan izanda, bere bizitza erabilgarriaren amaierara heltzen ari den instalazio nuklear baten jarduera luzatzeko aukera".