Ekonomia

Bernabe Unda Eusko Jaurlaritzako Industria, Merkataritza eta Turismo sailburuak esan du Patxi Lopez buru duen Gobernuak Kontzertu Ekonomikoa blindatzeko asmo "argia eta garbia" duela.

Radio Euskadiri eskainitako elkarrizketa batean, Undak ukatu egin du gaiak "urduritasuna" eragin duenik Jaurlaritzan, PSOEk Kongresuan har lezakeen jarrera dela eta.

Horren harira, Idoia Mendia Jaurlaritzako bozeramaileak esandakoa gogoratu du Undak, Lopezen Gobernuak Kontzertua blindatzeko asmo "argia" duela azpimarratzeko.

Mendiak berretsi du, Gobernu Kontseiluaren ostean, Jaurlaritzak Kontzertu Ekonomikoa blindatu nahi duela eta zehaztu du Zapaterori eta PSOEri asmo hori helarazi diotela, Legebiltzarreko talde guztiek bat egiten dutela gogoraraziz.

Legebiltzarraren Lege Proposamena, talde guztiek onartutakoa, urrian eztabaidatuko dute Kongresuan, eta bertan Auzitegi Konstituzionalaren eta Botere Judizialaren Legea aldatzea proposatzen dute Kontzertu Ekonomikoa blindatzeko.