Ekonomia

2010erako euskal aurrekontuaren %60,8a Osasun eta Hezkuntza sailetara bideratuko da. Datorren urtean 260 milioi euro gutxiago inbertituko dira, politika sozialak hobesteko. Murrizketa horrek, esaterako, ''Euskal Y''aren eraikuntzan izango du eragina eta egitasmoaren gauzatzea "apur bat" atzeratuko dela onartu du Jaurlaritzak.

Carlos Aguirre Ekonomia sailburuak eman ditu aurrekontuen inguruko xehetasunak. Guztira 10.315 milioi euro izango ditu Jaurlaritzak, 2009an baino %8,5 gutxiago (11.217 milioi euro izan zituen orduan).

Ekonomia eta Ogasun sailburuak aurreikusi duenez, funtzionamendurako gastuetan %6ko murrizketa izango da, Osakidetzaren programan izan ezik. Gauzak horrela, 1.914 milioi euroko zorra espero du.

Aguirreren apustua gizarte zerbitzuetarako diru-kopurua mantentzea da eta inbertsio gutxiago egitea. Horren ondorioz, dagoeneko martxan dauden egitasmo batzuk atzeratu egingo direla onartu du, baina proiektu horietako bat ere ez dela bertan behera geratuko azpimarratu du.

Murrizketaz baino, egitasmoen atzerapenaz hitz egin behar dela uste du sailburuak. Besteak beste, garraio eta ur azpiegituren garapenean izango du eragina neurriak. ''Euskal Y''aren eraikuntza, adibidez, atzeratu egingo da eta datorren urtean 225 milioi euroko aurrekontua izango du. Hala ere, 2009an jasandako atzerapena eta gero, Garraio Sailak lanak "bizkortzen" saiatuko da Gipuzkoan.

Aurten 5 atal berri eskainiko dira eta 2010ean beste 7.

Hori dela eta, Garraio Sailaren arabera, Gipuzkoako lanak bizkortzen saiatuko dira ahalik eta gehien; eta, beharrezko bada, Sustapen Ministerioari eskatuko diote aurrekontua moldatzea, "aurretik egin zuten bezala".

Ondoko sailetarako, berriz, diru gehiago izango da: Osasuna, Hezkuntza, Lana, Industria eta Segurtasuna. Inbertsio gutxiago izango dituztenak, ordea, hauek: Etxebizitza, Herri Lanak eta Garraioa, Lurralde Antolamendua eta Ekonomia eta Ogasuna.

Aurrekonturik handiena Osasun Sailak izango du: 3.525,6 milioi euro; Hezkuntza Sailarentzat, Unibertsitatea eta Ikerkuntzarako, 2.747,2 milioi; Herrizaingo Sailarentzat, 710,2 milioi; eta, azkenik, Herri Lan eta Garraio Sailerako, 704 milioi.

Jaurlaritzak PPrekin adostutako aurrekontuak babestuko ditu EAJk

Bestalde, Alderdi Sozialista datorren ostegunean saiatuko da EAJrekin akordio batera heltzen, alderdi horrek Jaurlaritza, diputazio eta udalen aurrekontuetarako egonkortasuna bermatzeko.

Alderdi Popularraren babesa lortu ostean, EAJrena izan nahi du PSEk. Gaur, Iñigo Urkulluk nahiz Andoni Ortuzarrek onartu dute "elkarrizketa oso aurreratuta" daudela, "aurre-akordio bat" erdietsi dutela eta hitzarmena asteburua baino lehen sinatuta egon daitekeela.