Ekonomia

Gipuzkoako Foru Aldundiak zerga-ordaintzaileen eginbeharrak bete daitezen "irmoki" jokatuko duela hitz eman du, Rafa Nadal tenis jokalariak 2006 eta 2011 artean lurraldean helbideratuta izan zituen elkarteak ikertzen ari direla dioten informazioen harira.

Aldundiak agiri bat zabaldu du, eta Nadalen izena aipatzen eta ikerketarik ote dagoen baieztatzen ez duen arren, gaiaren inguruan sortu den polemika baretu nahi izan du.

Agirian azaltzen duenez, "seriotasunez eta irmoki" jokatuko dute "zerga-ordaintzaileen eginbeharrak bete daitezen". Hala ere, "arduragatik eta zerga-ordaintzaileekiko errespetuagatik", ez omen du "datu gehiago emango".

Europa Pressek ikerketaren gertuko iturriak aipatuta jakinarazi duenez, ordea, egia da Nadalen enpresak ikertzen ari direla.

Nadalen erantzuna

Rafael Nadal tenis jokalariak, bere aldetik, beste agiri bat kaleratu du bere egoera fiskala azaltzeko. "Pertsona fisiko gisa zergak hasiera-hasieratik Balear Uharteetan" ordaindu dituela zehazten du bertan.

"Garai batean Euskal Herrian helbideratuta zeuden enpresak, baina Balear Uharteetara mugitu ziren gero, eta ez zen etekinik lortu aurreko arau fiskalengatik", gaineratu du oharrean.