Ekonomia

FROB Bankuak Berregituratzeko Funtsaren maileguak jaso dituzten entitateetako zuzendariek ezin izango dute urtean 600.000 euro baino gehiagoko ordainsaria jaso, Luis de Guindos Ekonomia ministroaren hitzetan. Besteak beste, BFA-Bankia, Banca Civica, BMN eta Caja España entitateek jaso dituzte mailegu horiek.

Espainiako Bankuari emandako datuen arabera, iaz BMNko zuzendariak soilik kokatu ziren muga horren azpitik; Caja Españako zuzendariek, aldiz, ez dute beren ordainsariei buruzko daturik eman nahi izan.

Entitate horien buruan Rodrigo Rato BFA-Bankiako presidentea dago; 2,34 milioi euro irabazten ditu urtero. Ondoren, Francisco Verdu Bankiako kontseilari delegatua dago; 2,26 milioi euro jasotzen ditu.

Antonio Pulido Banca Civicako presidenteak eta Enrique Goñi presidenteordeak 900.000 euroko ordainsariak aitortu zituzten, eta Carlos Egea BMNko presidenteak 450.000 euroko soldata du urtero.

Bestalde, De Guindosek azaldu duenez, Banco de Valenciako, Catalunya Caixako, Unnimeko eta Novagaliciako zuzendari nagusiek ez dute 300.000 euro baino gehiago jasoko urtero; izan ere, lau entitate horiek erreskatatu egin zituzten.