Ekonomia

Adolfo Muñoz ELAren idazkari nagusiak datorren otsailaren 25ean Bilbon murrizketen kontra egingo den manifestazioan parte hartzeko deia egin du, izan ere, "langabezia gehiago" omen dator, eta "administrazioetan dauden politikariak langabeziaren sarraskia geldiaraztera behartu behar ditugu".

Lanbide euskal enplegu zerbitzuaren aurka jo du ELAk. Sindikatuaren arabera, bada urtebete Jaurlaritzak enplegurako politika aktiboen eskuduntza bereganatu zuela, baina ez du lanposturik sortu.

ELAren hitzetan, Europako aginduen aurrean men egiten dute, eta enplegua sustatzeko ekimenak martxan jarri beharrean, defizita murrizteko neurriei bakarrik ekin diete administrazioek.

Muñozek uste du Lanbiderekin agerian gelditu dela enplegua sortzeko politikarik ez duela Jaurlaritzak. Are gehiago, Patxi Lopez lehendakariaren gobernuaren jokabidea dela eta, langabezi handiagoa dagoela uste dute.