Gizartea

Baliteke Segurtasun Nuklearreko Batzordeak (CSN) gaur argitzea Garoñako (Burgos) zentral nuklearrak beste 10 urtez jarrai dezakeen lanean. Ondoren, baina, Espainiako Gobernuak erabaki beharko du zentrala itxi edo zabalik utzi. Hauteskunde kanpainan, sozialistek zentralaren itxiera promestu zuten, baina badirudi azkenean lobby nuklearraren eskaria onartuko dutela.

Batzordearen erabakia halabeharrez betetzekoa izango da zentralari funtzionatzen jarraitzeko baimena ukatzen badio. Dena dela, hedabideei egindako filtrazioen arabera, azkenean baimena luzatzearen alde egingo du.

Segurtasun Nuklearreko Batzordea organo politikoa da, erakunde teknikoz jantzita badago ere. Izan ere, PSOEko bi ordezkarik, PPko bik eta CiUko batek osatzen dute, eta horietako hiruk ez dute inoiz lan egin energia nuklearraren sektorean.

Atzo arratsaldeko lehen orduan, CSNko kontseilariek bilera gaur arte atzeratzea erabaki zuten. Txostena emateko bihar arteko epea dute.