Garoñako (Burgos) zentral nuklearraren eztabaida kalean da. Baina energiaren kontua ez ezik, zentrala ixteak ekarriko lukeen eragin ekonomikoa ere dute hizpide.

Horren ildotik, zentralaren jabeek, Endesa eta Iberdrola konpainia elektrikoek, ohartarazi dute argindarra %10 garestituko litzatekeela itxiz gero.

Halaber, sektore nuklearretik ziurtatu dute "600 lanpostu zuzen eta zeharkako 400 baino gehiago" galduko liratekeela.

Eztabaidaren mugaren beste aldean, baina, Greenpeacek "faltsutzat" jo ditu datuok, eta Nuclenorreko (Iberdrolak eta Endesak sortutako enpresa) datuak aipatuta, zentralaren langile finkoak 323 direla ziurtatu du.

Halaber, argindarra garestituko litzatekeela ere ukatu du, "Garoñako zentral nuklearra duela hainbat urtetatik amortizatuta baitago eta Espainiako sistema elektrikoari egiten dion ekarpena jada orekatuta baitago energia berriztagarrien bidez".

Berriztagarriek lanpostu gehiago sortzen dituzte

CCOO sindikatuaren txosten baten arabera, sektore nuklearrak 4.124 langile zituen 2005 urtean. Horietako %52,8 zentraletako langile finkoak ziren.

Bere aldetik, energia berriztagarrien sektoreak 89.000 lanpostu zuzen zituen 2007ko amaieran, sindikatuaren beste txosten baten arabera. Datuok erakusten dute energia berriek aberastasun gehiago sortzen dutela sendientzat.