Gizartea

Gay harrotasunaren Nazioarteko Eguna da gaur eta ekitaldiak antolatu dituzte Euskal Herriko hainbat hiritan, lesbiana, gay, bisexualen eta transexualen eskubideak aldarrikatzeko.

''Stonewall Inn'' taberna gay, lesbiana, bisexual eta transexualen topalekua zen New Yorken. 1969an bezeroek poliziaren jazarpenari aurre egin zioten. Gertaera horrekin garai berri bat hasi zen gay, lesbiana, bisexualen eta transexualen eskubideen aldeko borrokan. Ordutik aurrera kalera ateratzen hasi ziren aktibistak homosexualitatearen izaera aldarrikatzera eta mundu osoan zabaldu zen horren oihartzuna.

''Stonewall'' tabernan hasitako borroken bide beretik hainbat ekitaldi eta aldarrikapen martxa egingo dira mundu osoan. Euskal Herrian, Bilbon 12:30etan Moyua plazatik irtengo da martxa. Gasteizen ordu berean Andre Mari Zuriaren plazatik, eta Iruñean 12:00etan autobus geltoki zaharretik.

Biarritzen eta Donostian aurrea hartu diote ordea. Biarritzen joan den asteburuan egin zuten aldarrikapena. Donostian, berriz, atzo ehunka pertsona kalera atera ziren kolorez, mozorroz eta musikaz lagunduta. Lelo nagusia: “Eskoletan armairurik ez”, diskriminaziorik gabeko irakaskuntza aldarrikatuz.

&' || 'nbsp;