Gizartea

San Ferminak ate joka ditugu eta eitb.com bederatzi egunez Nafarroako hiriburuan barrena murgilduko da. Uztailaren 6an, astelehenean, webguneak txupinazoa eskainiko du zuzenean, Iruñeko udaletxeko plazako giroa erakutsiz.

Entzierroek jarraipen berezia izango dute eta "ikusi" ahal izango dituzu Radio Euskadiri, Radio Vitoriari eta Euskadi Irratiari esker. Era berean, Radio Euskadi sanferminei buruzko erreportaje bereziak landuko ditu eta webgunean argitaratuko ditugu. Bideo formatuan, egunero, "Navarra Directo" saioko zatirik esanguratsuenak emango ditugu, bai eta albistegietako erreportajeak ere.

Halaber, San Fermin jaietako irudirik onenak eskegiko ditugu webgunean eta zu zeu ere gure argazkilari izan zaitezke gure argazkiblogera argazkiak igota. Era berean, zezenak ikuiluetatik zezen plazara eramateko aukera izango duzu gure sanferminetako jokoan. Ez harrapatu inor!

Baina benetan entzierroei buruz dena jakin nahi baduzu, sar zaitez gure infografian. Xehetasun guztiak dituzu bertan.

Amaitzeko, webguneak Pobre de Mi ikuskizuna emango du zuzenean, aurtengo sanferminei agur esanez. Hurrengo urtera arte, 2009ko sanferminekin gozatzen konformatu beharko dugu, esaterako, webgune honen bidez.