Gizartea

Jose Luis Rodriguez Zapaterok iragarri duenez, Espainiako Gobernuak gaur arratsaldean jakinaraziko du Garoñako zentral nuklearra irekita mantentzeko egindako proposamenaren harira hartu duten erabakia.

Miguel Sebastian Industria ministroak prentsaurrekoa eskainiko du 18:00etan, baina aurretik zentralaren kudeatzeaz arduratzen diren enpresekin eta bertako langileen ordezkariekin bilduko da.

"Alde batekoek eta bestekoek kritikatuko dute, baina erabakia orekatua da, erantzukizunez hartutakoa eta Espainiak behar duena", azpimarratu du Zapaterok. Etorkizuneko proiektuak energia nuklearretik "ezinbestekoa" dena eta energia berriztagarriak uztartu behar dituela babestu du.

RNE irrati-katean egindako elkarrizketan egin ditu adierazpenok, baina ez du erabakia aurreratu nahi izan, "enpresarien eta langileenganako errespetuagatik". Aitzitik, erabakiak PSOEk hauteskunde-programan agindutakoa oinarri duela esan du. Horrez gain, hausnarketa egiterakoan enplegua eta lurralde horretako etorkizuna aintzat hartu dutela adierazi du. "Erabakia arrazoizkoa eta orekatua da".

Hala eta guztiz ere, erabakia hartzea zaila izan dela onartu du. "Espainiako zentral nuklear zaharrenaz ari gara. Munduan bakarra dago gurea baino zaharragoa, Erresuma Batukoa, eta 2011an itxiko dute. Munduko zentral nuklear gehienek (67) 40 urte bete baino lehen itxi dituzte ateak. Orain lizentziak luzatzeko joera dago, baina e40 eta 50 urte baino gehiagoko nola funtzionatzen duten ez dakigu", azaldu du.

&' || 'nbsp;