Gizartea

Bermeoko Alakrana atun-ontziko 36 tripulatzaileak "onik daude", Ozeano Indiarrean piratek bahitu ostean. Hala baieztatu du Pilar Unzalu Eusko Jaurlaritzako Arrantza sailburuak.

Antza denez, konpainia bereko bigarren ontzi batek (Alakrantxu) ohartarazi du Espainiako Armadaren ''Canarias'' fragata eta honek dispositibo bat jarri du abian. Seychelles irletatik 415 itsas milietara dago ontzia.

Unzaluk azaldu duenez, piratek goizaldeko 5:30etan bahitu dute atunontzia. Alerta jaso dutenean, Luxenburgoko bi hegazkin autontziaren egoera ikustera joan dira eta ontzian pirata armatuak zeudela baieztatu ahal izan dute.

Komunikatu baten bitartez, sailburuak adierazi du Eusko Jaurlaritzak "babes-neurriak indartzearen alde" jarraituko duela, horrela euskal atunontzietan "honen gisako egoera dramatikoak" ekiditeko. Era berean, senitartekoen arretarako telefonoa jarri du martxan Gobernuak: 900 840 120.

"Atunontziko tripulatzaileei irtenbide bat emateko indarrak batu" behar direla nabarmendu du Arrantza sailburuak eta Xabier Legarreta Bermeoko alkateak egindako adierazpenei garrantzia kendu die. Alkateak erantzukizun politikoa eskatu dio Espainiako Gobernuari. "Legarretaren hitzak testuinguru baten barnean" eman direla azaldu du.

Lehendakariaren babesa

Bestalde, Patxi Lopez lehendakariak bahitutako ontziaren armadorearekin hitz egin du, "momentu zail hauetan Eusko Jaurlaritzaren elkartasuna adierazteko eta laguntza eskaintzeko".

Canarias ontzi militarra inguru horretan ari zen nabigatzen, hain zuzen ere bahiketak eta bestelako erasoak ekiditeko asmoz, Europako Batasunak jarritako operazioaren baitan. ''Canarias'' ontzi militarra eta P3 Orion hegazkina bahiketa gertatu den tokira joateko agindua eman du Defentsa Ministerioak. ''Canarias'' gerra ontzia ''Alakrana''tik egun bateko distantziara dago eta, ondorioz, Espainiako Gobernuak piraten erasoaren berri besterik ez dauka.

Bahiketaren unean Atalanta operazioaren eremutik kanpo zegoen atun-ontzia, Defentsako Ministerioren arabera. Alakran ontzia defentsa eremutik 800 milara zegoen lanean eta Somaliako kostaldetik 400 milara.

Bahiketa gertatu baino lehen, arrantzaleek 7 minutu izan dituzte gainontzeko ontzietako arduradunekin hitz egiteko eta, ondorioz, egoeraren berri emateko. Hale ere, Alakrana ontziaren egoeraren inguruko albiste gutxi dauzkate, piratek komunikazio guztiak eten dituztelako.

Beste eraso batetik ihes egin zuen

Joan den irailaren 4an ''Alakrana'' ontziak pirata somaliarren beste eraso bat pairatu zuen, baina orduan ihes egitea lortu zuen eta ez zuten bahitu.

Canarias ontziaz gain, Espainiako Armadaren hegazkin bat eta beste bi aireontzi jarri dituzte martxan.

Alakrana atunontzia joan den abuztuaren 31an itsasoratu zen eta 30 tripulante ditu (hamar euskal herritar, hamar galiziar eta gainerakoak beste herrialde batzuetakoak dira).

Kalatik ateratzeko agindua

Espainiako atunontzien armadoreek (17 ontzi guztira) Indiako Ozeanoan lanean dauden ontziei kalatik ateratzeko agindu diete.