Sei emakumek eta hiru gizonezkok osatzen dute Yllanes psikiatra epaituko duen epaimahaia. 20 urteko Nagore Laffage erizaintza ikasle irundarra hiltzea egotzi zioten Yllanesi. Fiskalak eta bost akusazioek erailketagatik zigor penalak eskatzea berretsi dute.

Nafarroako Probintzia Auzitegian hasi da epaiketa, epaimahaiko bederatzi kideen hautaketarekin. Epaiketak aste bat baino gehiago iraungo du eta bederatzi herritarrek osatzen dute epaimahaia.

2008ko uztailaren 7an hil zuten Irungo gaztea, Iruñeko etxe batean eta ondoren hiltzaileak Oianburura (Orondritz) eraman zuen haren gorpua. Fiskaltzak 20 urteko kartzela-zigorra eskatu du.

Fiskaltzak Iruñeko Jose Diego Yllanes Vizcayri leporatzen dio hilketa eta 20 urteko kartzela-zigorra eskatu du harentzat. Ustez, neskatoak harreman sexualak nahi izan ez zituelako hil zuen.

17:00etan gertatu zena berreraiki duen bideo bat ikusi dute eta gaur akusatuak deklaratu egingo du.

Larunbatean, ehunka pertsonak elkarretaratzea egin zuten Iruñeko Vínculo plazan Nagoreren oroimenez "egia, justizia eta oroimena" aldarrikatzeko.

Kontzentrazioa

Nagore Laffageren senideek lagunen, erakundeen eta emakumeen kontrako indarkeria salatzen duten kolektiboen babesa jaso dute ustezko hiltzailearen kontrako epaiketa hasi baino ordu batzuk lehenago, Epaitegiaren parean bertan.

Indarkeria Matxistaren Kontrako Emakumeen Plataformak deitutako kontzentraziora bertaratu dira 200 pertsona inguru, asko Irundik joandakoak.

Kontzentrazioan parte hartu dutenek "Justizia" eskatu dute, "Nagore, zure oroimenez" bezalako leloak agertu dituzte pankartetan eta emakumearen argazkiarekin egindako kamisetak zituzten soinean.

Herri-epaimahaiari "egoera soziala kontuan izan dezala, eta justua izateaz gain, Nagorek eta beste edozein emakumek bere biziaz erabakitzeko eta ezetz esateko duen eskubidea onar diezaiotela" eskatu diote.

Familia bertan egon da

Kontzentrazioan egon dira, baita ere, biktimaren gurasoak eta anaia. Asun Casasola amak eta Javier Laffage anaiak justizia eskatu dute kazetarien aurrean eta akusatuak fiskalak eskatu duen 20 urteko kartzela-zigorra osorik bete dezala exijitu dute.

Casasolak, horren harira, "oso urduri, akituta eta justizia egongo den esperantzarekin" daudela esan du: "16 hilabeteren ostean justizia izango dugula espero dut, frogek hala erakusten dute eta".

Jaurlaritzako ordezkariak ere izan dira kontzentrazioan, izan ere, herri-akusazio ere badira. Idoia Mendia bozeramaileak adierazi duenez, "Jaurlaritzaren eta lehendakariaren izenean Nagoreren familiari gertutasuna eta babesa emateko" joan da, baina baita "lehendakariak kargua hartu zuenean indarkeria jasaten duten emakumeen ondoan egoteko hartu zuen konpromisoagatik ere".

Hori dela eta, "emakumeen kontrako indarkeriari aurre egiteko" Jaurlaritzak "beste pauso bat" eman nahi duela eta epaiketetan abokatu propioak aurkeztea aztertzen ari direla iragarri du.

Nafarroako Parlamentuaren adierazpen instituzionala

Nafarroako Parlamentuko Bozeramaileen Batzordeak aho batez onartu du Nagore Laffageren eta Maria Puy Perezen familiei elkartasuna helarazteko adierazpena.

Nafarroa Baik aurkeztutako testuan, Parlamentuak "epaiketaren aurreko momentu gogorrotan gertutasuna" erakutsi nahi die Irungo gaztearen sendiari eta Lizarran desagertu zen emakumearen gertukoei.

Era berean, gizarteari "familiak bakarrik ez daudela" erakusteko eskea egin dio eta babes-ekitaldietan parte hartzeko deia egin die herritarrei.

Iruzkinak

orain albiste