Gizartea

Belen Greaves EAJren Euzkadi Buru Batzarreko idazkariak esan du Jaurlaritzak Hezkuntza arloan egin dituen aldaketek islatzen dutela "PPk Lopezen Gobernuan duen pisua".

Radio Euskadiri eskainitako elkarrizketan azaldu duenez, "PPk Lopezen Gobernuan duen pisua" erakusten dute, izan ere, "PPk aldaketaren aldeko gobernua izenpetu zuen, baina ez zituen Jaurlaritzan pertsonak sartu nahi izan, eta nahi ez zuenez, Hezkuntza sailburua Iñaki Oyarzabal izan beharrean, Isabel Celaak bete du haren lekua".

Greavesen esanetan, "PPri eta PSE-EEri galdetu beharko zaie zergatik aldatzen den hain modu partzialean elebitasuna ezarriko ez duen dekretu bat, zeren hori baita bi hizkuntza ofizial dituen herrialde batek behar duena".

Buruzagi jeltzaleak esan du EAJ Hezkuntza Sailaren buru izango balitz, euskara "babestuko" lukeela "gazteleraren gainetik". Haren arabera, eztabaida ez da "euskara komunikaziorako hizkuntza den ala ez", baizik eta "gure seme-alabek hezkuntza amaitzen dutenean euskararen ezagutza egokia izateko jarri behar diren baliabideak zeintzuk diren zehaztea".