Gizartea

60ko hamarkadan Frantziako detergente ospetsu baten iragarkietan agertzen zen umea Nicolas Sarkozy al zen? Hori da gaur Frantzian jakingura eragin duen galdera, eta baita munduan ere, CB News aldizkariak iragarkietan azaltzen zen haur ilehoria Frantziako agintaria zela baieztatu ostean.

Bonux detergentearen argazkia da gaur Interneten gehien zirkulatzen ari den iragarkia. Bertan ume frantses bat agertzen da hegazkin batekin jolasten. 40 urte geroago haur hori Errepublikako presidente bihurtu dela ematen du. Bonux detergentea ezaguna zen Frantzian, paketeetan opariak zituelako.

Ume konkretu hori Sarkozy denik gezurtatu du Frantziako Gobernuak, baina markaren beste iragarkietan parte hartu duenik ez du ukatu, izan ere, agintariaren aitak iragarkia sortu zuen enpresan lan egiten zuen. Pal Sarkozy Frantziako presidentearen aitak argazkian agertzen dena bere semea ez dela esan du.

"Publizitatea 1967koa da eta guk ez dugu erregistrorik gordetzen, horregatik nor den jakitea ezinezkoa da", onartu zuen atzo detergentearen markak. Hala ere, argazkia argitaratu ostean, zenbait komunikabidek Nicolas Sarkozyren biografiak berreskuratu dituzte eta bertan presidenteak txikitan detergente baten bideoan parte hartu zuela esaten da, eta baita garbigarri baten bilgarrian bere irudia agertu ere.