Gizartea

Espainiako Gobernuak larrialdiko bilera deitu du ''Alakrana''ren bahiketa jarraitzeko, izan ere, azken berrien arabera hiru arrantzale lurrera eramateko erabakia hartu dute piratek.

Bilera horretan, besteak beste, Carme Chacon Defentsa ministroak, Maria Teresa Fernandez de la Vega Gobernuko presidenteordeak, CNIko ordezkariek eta Armadako zenbait buruzagik hartuko dute parte.

Maria Teresa Fernandez de la Vegak gaur goizean azpimarratu duenez, ''Alakrana'' ontziaren bahiketa amaitzeko "ahal duen guztia" egiten ari da Exekutiboa eta, ondorioz, "lasaitasuna" eskatu die tripulazioaren familiei.

"Gure eskuetan dagoen guztia egiten ari gara. Dena laster amaituko denaren itxaropena izan behar dugu", adierazi du.

Diputatuen Kongresuan egin dituen adierazpenetan, kudeaketaren inguruko xehetasunak emateari uko egin dio, "zuhurtzia eta erantzukizunagatik".

Gobernua egoeraren larritasunaren jabe dela nabarmendu du, "lehenengo egunetik" lanean ari dela. Gauzak horrela, "lasaitasunerako mezua" igorri du.