Jose Diego Yllanesen amak esan du bere semea gazte "arduratsua" dela eta orain arte izan dituen bi neskalgunak "zaintzen" zituela. "Uste dut harreman ona zutela", erantsi du.

Auzipetuaren amak adierazi duenez, hilketa gertatu zen goizean hainbat aldiz deitu zion mugikorrera semeari, etxera itzultzen ez zela ikusita. Ikerketaren arabera 10:03an Nagore Laffagek hartu zuen deia egin zuela ez zela ohartu adierazi du.

Fiskalaren galderari erantzunez, dei horretaz ohartu ez arren, minutu bat beranduago berak berriro deitu zuela ekarri du gogora, izan ere, une oro deiak egiten aritu zela esan du.

Gertakariak jazo zirenetik, uztailaren 8ko goizaldean ikusi zuen lehenengo aldiz bere semean, Sorgainen. Edanda zegoenaren zantzuak ote zituen galdetuta, amak esan du "joanda" bezala zegoela, "hotzarekin", eta bakean uzteko eskatu ziela gurasoei, "horrela ezin zuelako jarraitu".

Jose Diego Yllanes gutxitan ateratzen zela parrandan esan du, eta adibide moduan aipatu du uztailaren 6aren aurretik egindako azken parranda otsailean izan zela. Hori bai, ateratzen zenean berandu bueltatzen zela etxera azpimarratu du.

Hala ere, Jose Diego Yllanesek bi koma-etiliko izan dituela eta bere senarraren familian badirela kasuak non alkohola ez dutela onartzen azaldu du. Horrez gain, bere semeak ez duela drogarik hartzen esan du.

Bestalde, autoritarioa eta guratsua ez dela esan du. Semearekin "harreman nahiko ona" duela eta bere aitarekin ere ondo konpontzen dela erantsi du.

Nagoreren amak gazte "alaia eta arduratsua" zela esan du

Asun Casasola Nagore Laffageren amak gaur goizeko saioan eman du lehen aldiz testigua eta bere alaba maitekorra izateaz gain, "bizitasun handikoa, oso atsegina, eta oso alaia, baina nortasun handikoa" zela esan du. Gaineratu duenaren arabera, oso irekia zen eta lagun asko zituen. "Oso arduratsua zen", adierazi du.

Akusazio partikularraren galderen aurrean, Casasolak uztailaren 8an bere alabaren heriotzaren berri Ertzaintzaren bitartez jaso zuela eta gorpua ezagutzeko Iruñera joan zela azaldu du.

Azaldu duenez, bere ahizpak eta koinatuak lagundu zuten, eta haiek izan ziren gaztearen gorpua identifikatu zutenak. Hilotzak zituen kolpeak zirela eta, ez ikusteko esan zioten. Ordura arte zuen gaztearen irudiarekin gelditzeko gomendatu zioten.

Nagoreren lagunekin izandako ondorengo elkarrizketa batean, gaztea hil zutela esan zien eta orduan lagunek hiltzailea Jose Diego Yllanes izan zitekeela pentsatu zutela adierazi du. SOS Navarrak jasotako deian bere alabaren ahotsa ezagutzen zuen galdetu diotenean, baietz erantzun du, baina ez murmurioan.

Casasolak bere alaba bortitza ez zela esan du, baina nortasun sendoa zuela gaineratu du. "Multizalea" al zen galdetu diotenean, amak bere alabak mutilak gustuko zituela eta esperientzia txarrik ez zuela izan adierazi du. "Izanez gero salatu egingo zituen edo niri esango zizkidan. Gauza argiagorik ez daukat", adierazi du. Edaten al zuen galdetu diotenean, ez zuela egiten esan du eta egiten zuenean "kontrolatzen" zuela.

Akusazio partikularraren galderei, amak bere alaba hil zenetik ez dela bizi, tratamendu psikiatrikoa jasotzen ari dela eta ia ez duela lorik egiten erantzun die. Duela 16 hilabete "familiarik ez" dagoela esan du eta "hau guztia" amaitzen denean errekuperatzea espero duela gaineratu du. "Justizia bilatzen dut, nire familia elkartu eta bizitzen jarraitu", adierazi du, "hau bukatzea behar" duela baieztatzeko.

"Neskazalea" izatea leporatu diote Yllanesi

Biktimaren pisu-kidea zen lagun batek ere testigantza eman du gaur goizean. Nagore Laffagek bezala, akusatua lan arrazoiengatik "bistaz" ezagutzen zuela adierazi du eta horregatik elkarrekin joateak ez zuen harritu.

Yllanes "andrezalea" zela zioten zurrumurruak zeudela adierazi du, "emakumeak gustuko zituen", esan du. "Erizaintzako ikasleak gustuko zituen, erizainak", gaineratu du.

Bere ustez, gazte irundarrak ez luke inoiz ikusi ez zuen ezezagun batekin alde egingo eta Jose Diego Yllanesekin "nor zen zekielako" joan zen. Laffageri buruz, "haserretuz gero, nortasun indartsua" zuela eta bortitza ez zela azaldu du.

Uztailaren 6an Nagore Laffagerekin eta etxeko beste lagun batzuekin atera zela kontatu du, baina goizaldeko ordu bata edo ordu biak aldera banandu egin zirela esan du. Biktimak, une horretan, ia ez zuen edan.

"Ondo utzi nuen", azaldu du, "noizean behin eta oso gutxi" edaten zuela ziurtatzeko. "Ez zuen inoiz asko edaten", baietsi du.

Fiskaltzak egindako galderei erantzunez, Laffageren lagunak adierazi du etxetik atera baino lehen gazte iruindarrak ubeldurarik ez zuela eta inongo minik zuenik ere ez zuen esan.

Bideokonferentzia bidez, Nagore Laffage uztailaren 6an ezagutu zuen eta bi edo hiru ordu biktimarekin igaro zituen gazte batek testigantza eman du. Esan duenaren arabera, gau hartan edan egin zuten, baina Laffage mozkor ez zegoela adierazi du, "ondo zegoen, normal". Goizaldeko lauak aldera banandu egin ziren, Laffage "mutil batekin gelditu zen".