Gizartea

Alakrana atunontzia bahitzeagatik atxilotutako bi itsaslapurrak Somaliara edo Kenya bezalako gertuko herrialde batera itzultzea azter dezaten eskatu die gaur Patxi Lopez lehendakariak agintari judizialei, bertan epaitu ditzaten. Era berean, lehorreratutako hiru arrantzaleak non diren badakitela eta onik daudela adierazi du.

Elena Espinosa Arrantza ministroarekin Gasteizen bildu ostean egin ditu adierazpenak Lopezek. Izan ere, bahitutako ontzitik hiru arrantzale atera eta lehorrera eraman dituzte itsaslapurrek. Gainera, atxilotutako bi piratak askatu ezean, hiru arrantzale horiek hil egingo dituztela mehatxu egin dute.

Lehorreratutako hiru arrantzaleak "non dauden eta onik" daudela badakitela baieztatu dio Espainiako Gobernuak, lehendakariaren hitzetan. "Onik daude, gainerako tripulatzaileak bezala", erantsi du.

Era berean, bi itsaslapurrak Somaliara edo gertuko beste Estatu batera itzultzea azter dezaten eskatu die Lopezek agintari judizialei, beti ere "legedia errespetatuz". "Tripulazioa arriskuan jartzen duen ezer ez egitea eskatu dut", gaineratu du.

Negoziaketetan aurrera egiteko lanean ari direla azpimarratu du lehendakariak, guztia "pertsonen segurtasuna bermatuz".

Espinosa senitartekoekin bildu da

Bestalde, Arrantza ministroa atunontziko euskal arrantzaleen zenbait senitartekorekin bildu da gauean, Espainiako Gobernuak Bilbon duen Ordezkariordetzan.