Gizartea

Constantino Mendez Defentsako estatu idazkariak ez du baztertzen operazio militarra egitea Alakrana euskal atunontzia askatzeko, "ez baita ezer baztertu behar".

"Noski, Armadak balizko operazio guztiak aztertu eta kalkulatu ditu, badaezpada abiatu behar dituen", gaineratu du.

RNEn egindako elkarrizketan, Mendezek esan du "jurisdikzioari buruzko gaiak" eztabaidagai har daitezkeela, baina Espainian kartzelatuta dauden bi piratak Justiziaren esku daudela, "eta hori ez da negoziagarria".

"Zuzenbidea ez da matematika, eta beraz, hari buruz iritzia eman daiteke", esan du, Patxi Lopez lehendakariak aipatu bi piratak Somalian edo Kenyan epaitzea eskatu eta gero.

Estatu idazkariak ziurtatu du Somaliara eraman dituzten hiru arrantzaleak "onik" daudela, eta Defentsa Ministerioak jakin badakiela non dauzkaten.

Bere esanetan, Gobernuak uste du piratek "dramatismoa eta nahasmena" sortu nahi dutela.

Senideek piratei ez esarotzea eskatu dute

Beren aldetik, tripulatzaileen senideek piratei eraso ez egitea erregutu diote Gobernuari.

Bermeon (Bizkaia) eskainitako prentsaurrekoan, senideek adierazpen bat irakurri dute, eta berehala neurriak hartzeko eskatu diete, 36 tripulatzaileak "lehenbaileen" etxean egon ahal izateko.

"Gure senarrak etxean daudenean haien artean (erakundeen eta alderdien artean) borroka egin dezatela nahi badute, baina orain ez dezatela auzia politizatu", nabarmendu du Maria Angeles Jimenezek, Gaizka Iturbe arrantzalearen emazteak.

Mendezen hitzak hitz, Jon Azkue Eusko Jaurlaritzako Arrantza sailburuordeak adierazi du "oinarri legala" badagoela kartzelatutako bi piratak Somaliara edo inguru hartako beste herrialde batera eraman ahal izateko.

Horren ildotik, ETBn egindako elkarrizketa batean, Azkuek gogorarazi du Botere Judizialaren Lege Organikoa erreformatu berri dutela, jurisdikzio unibertsalaren printzipioak biktima espainiarrak edo delituaren egileak Espainian dauden kasuetan baino ez erabiltzeko Auzitegi Nazionalean.

Halaber, sailburuordeak argudiatu du Espainiak akordioa sinatu zuela maiatzean Kenyarekin, eta horren ondorioz Armadak atxilotutako zazpi pirata somaliar herrialde hartara bidali zituztela.

Lehendakariak "bere esku dagoen guztia" egitea promestu du

Patxi Lopez lehendakariak "bere esku dagoen guztia" egitea agindu du gaur tripulatzaile guztiak "lehenbailehen" askatu ahal izateko, baina betiere haien "segurtasuna" bermatuta.

Lehendakariak "elkartasun" hitzak igorri dizkie arrantzaleen senideei Eusko Legebiltzarreko kontrol saioari hasiera emateko, eta tripulatzaileak askatzea euren "lehentasuna" dela esan du.

Hiru arrantzale lurrera eraman zituzten

Bien bitartean, gizartean kezka da nagusi Alakranari buruzko albisteen zain, eta arrantzaleen sendiak lur jota daude, itsas-lapurrek banan-banan hil egingo dituztela mehatxu egin zutelako, Auzitegi Nazionalak kartzelatutako bi piratak askatu ezean.

Bermeoko atunontziaren egoera atzo goizean okertu zen gehien, piraten buruak itsasontzian sartu eta tripulazioko hiru kide, bat euskal herritarra eta besteak galiziarrak, Somaliako lurrera eraman zituztenean.

Hiru horietatik, Manuel Antonio Perez Fernandez Boiroko (Galizia) arrantzalearen izena bakarrik zabaldu da, Xose Deira herri horretako alkateak baieztatu duenez.

"Bi piratak askatu ezean, hil egingo dituzte hiru egun barru"

Piraten mehatxuak larritu egin ziren atzo arratsaldean. Ricardo Blach atunontziaren patroiak Radio Euskadiri eskainitako elkarrizketan adierazi zuenez, hiru egun barru piratak askatzen ez bazituzte arrantzaleak hil egingo zituztela ohartarazi zieten piratek.

Blachek esan zuen oso txarra dela oraintxe ontzian duten egoera: "Janari nahikoa dugu, baina urik ez". Gainera, Espainiako Gobernuari "gezurrik ez" esateko eskatu dio.

Erreskatearen ordainketa adostuta egon liteke

Badirudi kartzelatutako piraten kontuak oztopatzen duela soilik atunontzia askatzeko prozesua, izan ere, erreskatearen ordainketa adostuta egon liteke.

Horixe ondoriozta daiteke patroiaren hitzetatik: "Diruaren arazoa konponduta dago, baina bi horiek (piratak) askatzea nahi dute".

"Etortzen direnean, adostuta dagoen diruarekin, biak etorriko dira, dirua etorriko da, eta guk alde egingo dugu".

Bermeon portua duen Alakrana urriaren 2an bahitu zuten piratek Indiako Ozeanoko nazioarteko uretan, bahiketa saiakera batetik alde egitea lortu eta hilabetera.

Euskal atunontzi bat bahitzen duten bigarren aldia da, izan ere, 2008ko apirilaren 20an Playa de Bakio ontzia bahitu zuten, baina sei egunera aske geratu ziren tripulazioko kideak.

Zehazki, Alakranaren tripulazioa 7 euskal arrantzalek, 9 galiziarrek, 2 malaisiarrek, 3 senegaldarrek, Ghanako 4 herritarrek, Marfil Kostako 2 herritarreko, Seychelleseko beste batek eta 8 indonesiarrek osatzen dute.