"Egoerako konplexutasunaren barnean, Somaliako lehen ministroak albistea baieztatu digu Nairobiko (Kenya) enbaxadoreari eta niri", azaldu du Miguel Angel Moratinos Atzerri ministroak. Atzo lehorreratutako hiru arrantzaleak Alakrana-ra itzuli direla jakitera eman du Moratinosek.

Omar Abdirashid Ali Sharmarke Somaliako lehen ministroak Nicolas Martin Cinto Espainiak Kenyan duen enbaxadoreari izandako azken mugimenduaren berri eman dio. Era berean, hiru arrantzaleak "onik" daudela esan du Moratinosek.

Itsasontzira nola itzuli diren ez du zehaztu Atzerri ministroak, baina inteligentzia zerbitzuek oraindik hiru arrantzaleen itzulera egiaztatzerik izan ez dutela azpimarratu du.

Arrantzaleak ontzira bueltatzea "momentuz lasaitasun handiagoa ematen du", Moratinosen esanetan, itxaropena izaten jarraitzeko.

Hala ere, "azken fasean gaudela esateko data bat jartzea arduragabekeria" izango litzatekeela nabarmendu du.

Lehorreratutako hiru arrantzaleak ontzira itzultzea "pauso positiboa" dela esan du Eusko Jaurlaritzak, eta baita negoziaketan egiten ari diren ahaleginek "bahiketaren amaiera ekarriko" dutenaren "froga" ere.

Bestalde, arrantzaleen senitartekoak "itxaropentsu" agertu dira gauean, jasotako azken albistearekin.

Elkarretaratzea larunbatean

Familiek jakinarazi dutenez, bihar Bermeon elkarretaratzea egingo dute ''Gure arrantzaleak askatu'' lelopean, "gizartean babesa eta elkartasuna jasotzeko asmoz".

Maria Angeles Jimenezek zehaztu duenez, elkarretaratzea 12:00etan izango da, Bermeoko Portu Zaharrean. Elkarretaratzean izango dela jakinarazi du Eusko Jaurlaritzak, Radio Euskadik jakin ahal izanduenez. Iñigo Urkullu EAJko presidentea etaJesus Mari Larrazabal EAko legebiltzarkidea joango dira ere. Era berean,Aralarrek parte hartuko duela esan du.

Bilera auzitegi Nazionalean

Bestalde, Angel Juanes Auzitegi Nazionaleko presidentea Alakrana-ko senitartekoekin bilduko da datorren asteartean Auzitegi Nazionalean. Bilera goizeko 13:00etan izango da.

Maria Teresa Fernandez de la Vega

Espainian diren bi itsaslapur somaliarren lekualdatzeari buruz erabakitzea Justiziari dagokiola esan du gaur Maria Teresa Fernandez de la Vega Espainiako Gobernuko presidenteordeak, ondorioz, Exekutiboak irizpide "horien arabera" jokatu behar du. Gai honi buruz mintzatzea "ausartegia" izango litzakeela uste du De la Vegak, izan ere, gai "tekniko eta juridiko oso konplexua" da, baina "Justizia aztertzen ari da".

Ministroen Kontseiluaren ostean emandako prentsaurrekoan, Gobernua "ahal duen guztia egiten ari" dela azpimarratu du preisdenteordeak.

Bestalde, Alakrana arrantza-ontziko senitartekoak "egoki" eta momentu oro informatu ditzan eskatu dio Eusko Legebiltzarrak Gobernu zentralari aho batez, "negoziaketen eta edozein aldaketen berri emanez". Gainera, "Somaliako uretan Espainiako beste ontziek babes gabe jarrai ez dezaten beharrezko neurriak hartzea" eskatu du.

Senitartekoen prentsaurrekoa

Alakrana ontziko arrantzale batzuen senideak Bermeon bildu dira eta Kultur Etxean agerraldia egin dute, azken berriek egoeraren larritasuna agerian utzi ostean. Ontzian dauden 36 arrantzaleak "lehenbailehen" etxeratzeko "berehala" jarduteko exijitu diete erakundeei eta operazio-militarrik ez hasteko eskatu diote Gobernuari.

Horrez gain, Espainian atxilotuta dauden bi pirata somaliarrak "lehenbailehen" libre uzteko galdegin dute, hori egin ezean "gure senideen bizia arriskuan jartzen ari dira".

Atzo piratek heriotza-mehatxua egin zuten: Espainian atxilotuta dauden bi piratak hiru egun baino lehen askatu ezean, lehorrera eraman dituzten hiru arrantzaleak hil egingo dituztela ohartarazi zuten.

Argi Galbarriatu, ontziko kapitainaren arrebak, zehaztu duenez, atzo Elena Espinosa Arrantza eta Ingurumen ministroak "argi utzi zuen" bi pirata somaliarrak libre uztea oso zaila izango dela, eskumen hori Auzitegi Nazionalarena delako eta ez Gobernuarena.

Prentsaurrekoan Maria Angeles Jimenez Gaizka Iturbe marinelaren emaztea ere egon da. Jimenezek nabarmendu du bi egun baino ez direla geratzen piratek emandako epea amaitzeko eta, beraz, Gobernuari "lanean hasteko" eskatu dio; alderdiei, berriz, "Gobernuarekin elkarlanean aritzeko" deia egin die.

"Gure senideak etxean daudenean borroka daitezela euren artean nahi badute, baina orain alderdikeriak utz ditzatela", nabarmendu du. Ildo horretan, Gobernuari arduraz jotzeko exijitu dio eta operazio-militarraren aukera bazter dezala.

Balizko operazio-militarra

Bestalde, Defentsa Ministerioak gaur azpimarratu duenez, ez dute baztertzen operazio-militar bat abian jartzea ''Alakrana''ko tripulazioa askatzeko. Horrez gain, Constantino Mendez Estatuko Defentsa idazkariak Patxi Lopezi ohartarazi dio Espainian atxilotuta dauden bi piratak Justiziaren esku daudela eta hori ez dela "negoziagarri".

Bi pirata horiek Somaliara eramateko eskatu zuen atzo lehendakariak, horrek bahiketa amaitzen lagunduko badu.