Gizartea

Bihar, larunbata, TAO gunea zabaldu egingo dute eta zenbait lekuetan aparkatzea hiru aldiz gehiago kostatuko da. Gainera, bizilagunek 40 euro ordaindu beharko dituzte aparkaleku txartel bat eskuratzeko.

22 bizilagun elkartek ia 15.000 sinadura lortu dituzte TAO berriaren aurka eta baliogabetasun errekurtso bat aurkeztu dute.

Gasteizko aparkalekuen arautze sistemak (TAO) bihartik aurrera 14 kale hartuko ditu eta tarifek gora egingo dute. Horrela, "ordenatu gabe" zegoen egoera bat "berriz ordenatzeko" aukera emango du eta ibilgailuen zirkulazioa erraztuko du Patxi Lazcoz Gasteizko alkatearen arabera.

Bihartik aurrera auzoetako bizilagunek bertakoentzako txartela eskuratzeko gune urdinetan aparkatzeko txartela ordaindu beharko dute. Urte osorako 40 euro balioko ditu, baina neurria azaroan hasiko denez, ekitaldi honetan urte bukaerara arteko kopuru proportzionala bakarrik ordaindu beharko dute.