Gizartea

Eusko Legebiltzarreko Hezkuntza Komisioan eskatutako agerraldi batean, Isabel Celaa Hezkuntza sailburuak eskola "transformatuko" duen "Eskola 2.0" programa aurkeztu du.

Bere Sailak 12,6 milioi euroko inbertsioa egingo du Lehen Hezkuntzako 5. mailako ikasle guztiek Interneteko konexioa izango duten mini-ordenadore bat izan dezaten.

Guztira, Lehen Hezkuntzako 5. maila irakasten duten 539 eskola publikotan eta 401 hitzartutako zentrotan banatuko dira 18.159 mini-portatil horiek eta "zorte pixka batekin otsailan" iritsiko dira. Ordenagailuek software librea (Linux) eta Microsofta izango dute.

Celaak Hezkuntza Sailak software libreari eman nahi dion bultzada azpimarratu du eta jabedun softwarea (Microsoft) erabili nahi dutenentzat "ordezkatzaile" bezala egongo dela zehaztu du.

Horrez gain, Celaak euskal eskola hezkuntza munduan transformazio teknologikoa egiteko "zerotik" hasten ez dela adierazi du. Izan ere, 2000tik ikasgeletan informazio eta komunikazio teknologiak hedatzeko programak ezarri dira.

Hala ere, "Eskola 2.0" programak hezkuntzan "aldaketa metodologiko handia" eragingo duela azpimarratu du. Ikasgela informatizatu egingo da eta "informazio eta teknologia teknikak irakaskuntza eta ikaskuntza prozesuan sartuko dira".

Euskarazko multimedia edukiei dagokienez, "Eskola 2.0" euskarazko edukiak sortzeko "eragingarria" izango dela esan du eta "B eta D ereduetako Lehen Hezkuntzako 5. mailako ikasleek ez dutela erabiltzen ez duten beste hizkuntza baten inbasiorik izango".