Gizartea

Urriaren 2an Alakrana atunontzi bermeotarra bahitu zuten piratek tripulazioko kideak askatu dituzte, Jose Luis Rodriguez Zapatero Gobernuko presidenteak prentsaurreko batean baieztatu duenez.&' || 'nbsp;

Zapaterok gaineratu du arrantzaleak "egoera onean" daudela eta dagoeneko ur seguruagoetarako bidean direla.

Zenbait iturriren arabera, bahitzaileek 2 eta 3 milioi euro arteko erreskatea jaso eta gero utzi dituzte libre arrantzaleak. Antza, ontziaren armadoreak ordaindu egin du.

Goiz osoan zehar izan dira horren inguruko zurrumurruak, baina arratsaldeko 14:30 jotzeko minutu batzuk falta zirenean baieztatu du Gobernuko presidenteak

Ricardo Blach Alakrana-ren patroiak "bi egun baino lehen" askatuko dituztela esan du eguneko lehen orduan, baina bahiketaren amaiera iragarriko duen deiaren zain daudela gaineratu du geroago. Gero eta gertuago zegoen arrantzaleak aske uztea.

Piratak Alakrana-ko arrantzaleak askatzen hasi direla zabaldu du Reuters albiste-agentziak eguerdi aldera. Baieztapen ofiziala, baina, 14:25ean iritsi da, Zapatero presidenteak Moncloa Jauregian egin duen agerraldian.

Bahiketak iraun duen bitartean bizitako sufrimenduagatik gogoan izan ditu arrantzaleen senideak. "Oso gaizki pasatu dute, baina jarrera ona erakutsi dute", erantsi du.

"Alakrana-ko arrantzaleak, euren familiak eta armadorea" goraipatu ditu Zapaterok, "une zailak eta gogorrak bizi izan dituztelako".

Ildo horretan, Eusko Jaurlaritzak adierazi du "babesa ematen jarraitu" behar dela eta txalotu egin du "tripulatzaileek eta euren senitartekoek bizi izan duten egoeran izan duten sendotasuna".

Alakrana ontziko tripulatzaile euskaldunen senitartekoek agerraldi jendetsua egin dute Bermeoko udaletxean atunontziaren askapenak sortu dien poza adierazteko.

Tripulatzaileen egoeraren inguruan esan dute marinelak "lasai" daudela, askatasunak "ezustean" harrapatu dituela eta "portura iristeko irrikan" daudela.

Oztopo nagusia, gaindituta

Azken asteotan, atunontzia askatzeko oztopo nagusia Armada espainiarrak atxilotutako bi bahitzaileak espetxeratzea izan da. Hala ere, Santiago Pedraz Audientzia Nazionaleko epaileak prozesu judiziala azkartu zuen atzo eta piratak Somaliara eramateko bidea erraztu zuen.

Santiago Pedraz Auzitegi Nazionaleko epaileak gaur amaitu du Alakrana-ren bahiketan parte hartu zutela leporatuta kartzelatutako bi piraten kontrako sumarioa eta zigor aretora bidali du. Epaiketa bi aste barru izan liteke, iturri juridikoen arabera.

Abdu Willyk eta Raageggese Adji Hamanek gaur goizean jaso dute haien kontrako prozeduraren berri, hala ere, ukatu egin dituzte akusazio guztiak.

Hala ere, Pedrazek irekita mantenduko du euskal atunontziaren bahiketa kasua, eta Euskal Herrira eta Galiziara joan liteke (marinelen jaioterrietara) izapideak helaraztera.

Alakrana duela 47 egun bahitu zuten pirata somaliarrek Indiako Ozeanoko nazioarteko uretan arrantzan zebilenean, beste bahiketa batetik ihes egin eta hilabete batera, hain zuzen ere.

Caamaño

Alakrana askatzeko Espainiako Gobernuak erreskaterik ordaindu ez duela defendatu du Francisco Caamaño Justizia ministroak eta, horren harian, Exekutiboak une oro "legediaren barnean" jardun duela azpimarratu du.

Armadorea

Bestalde, Jose Angel Angulo ANABAC armadoreen elkarteko zuzendari-kudeatzaileak ontziko arrantzaleen senitartekoen lana goraipatu du, eta "oso ausartak" izan direla esan du.

Angulo Radio Euskadiko ''Ganbara'' saioan elkarrizketatu dute, eta "zenbait ekintza itsaslapurren mesederako" izan direla salatu du. Era berean, ''Atalanta'' operazioak "Indiako Ozeanoan lanean ari diren atunontziak alde batera utzi" dituela kritikatu eta horientzat "babes handiagoa" eskatu du.