Gizartea

12 urte eta erdiko espetxe-zigorra ezarri diote Jose Diego Yllanesi Nagore Laffage hiltzeagatik, fiskalak eskatutako zigorra, hain zuzen ere. Herri-epaimahaiak joan den ostiralean egotzi zion homizidioa Jose Diego Yllanesi eta epaileak astebeteko epea izan du epaia erabakitzeko.

Nafarroako Auzitegi Nagusiak jakitera eman duenez, epaileak kontuan hartu du Yllanesek kalte-ordainak (120.000 euro amarentzat eta beste horrenbeste aitarentzat eta 80.000 euro Nagoreren nebarentzat) ordaindu dizkiola Laffage sendiari eta gertakarien egunean mozkortuta zegoela.

Herri-epaimahaiaren erabakia ezagutu ostean, fiskalak 12 urte eta sei hilabeteko espetxealdia eskatu zuen Yllansentzat; akusazio partikularrak, berriz, 15 urteko zigorra.

Nolanahi ere, biek iragarri zuten herri-epaimahaiaren erabakiaren aurka helegitea aurkeztuko zutela; izan ere, bai fiskalak bai akusazio partikularrak ere Yllanesi hilketa egoztea eskatu zuten epaiketan eta, ondorioz, 17 eta 20 urte arteko espetxe-zigorrak eskatu zituzten.

Defentsak homizidio delitua babestu zuen eta 7 urteko kartzelaldia galdegin zuen, besteak beste, Yllanesek kalte-ordainak ordaindu dituela, krimenaren egunean mozkortuta zegoela eta hilketa aitortu zuela argudiatuta. Era berean, hilotza profanatzea ez leporatzea eskatu zuen.