Gizartea

Jorge Cua Santiago Mainarri ebakuntza egin zion oftalmologoak (2006ko abuztuaren 29an) prosezu honetako bosgarren saioan baieztatu duenez, Miguel Grima Fagoko alkatea tirokatzeko arazorik ez zukeen izango Mainarrek.

Cuaren arabera, ebakuntza egin baino lehen, Mainarrek % 50eko ikusmena zuen bi begietan eta, ebakuntzaren ostean, % 80koa betaurrekorik gabe eskuineko begian eta % 90ekoa betaurrekoekin; ezkerrekoarekin, ordea, % 50ekoa.

Herri akusazioak egindako galderei erantzunda, oftalmologoak baieztatu du ikusmen horrekin sei metrora tabako pakete bat ikus zezakeela, baita silueta bat ere 10 edo 12 metrora, besoak, adarrak eta enborra ondo bereizita.

Oftalmologoak gaineratu duenez, "katarata eboluzioa daukan gaixotasuna da eta 2006ean % 50ko ikusmena bazuen, normalena litzateke orain gutxiago ikustea".

Herri akusazioaren abokatuak balizko egoera bat planteatu du: Mainarrek %30eko ikusmena ezkerreko begian (bertan ez zioten ebakuntzarik egin), katarataren eboluzioa dela eta, eta eskumakoan % 80 edo 90ekoa balu, tabako paketea sei metrora eta silueta 10 edo 12ra ikusiko lituzkeen galdetu du; Cua baiezkoaren alde agertu da.