Gizartea

Aita Santuak Jose Ignacio Munilla Aguirre gaurizendatu du Donostiako gotzain. Palentzian egin dituen adierazpen batzuetan, Munillak azaldu du ez daukala "eztabaidarako gogorik" eta "denon artzain" izan nahi duela "inor baztertu gabe".

Munilla Donostian jaio zen 1961. urteko azaroaren 13an eta Donostiako gotzain izendatu dutenetik egin dituen lehen adierazpenetan jakinarazi duenez, urtarrilaren 9an Donostiako Artzain Onaren katedralean hartuko du kargu berria.

Orain arte Palentziako gotzaina zenak esan du ez duela "liskarrik nahi" azken egunotan Euskadiko hainbat politikarik egin dituzten kritiken inguruan, eta azaldu du oinarrizkoa dela "harreman pertsonalak mantentzea".

Horren harira adierazi du, "bazterketarik gabe, borondate ona" egongo dela espero duela.

Bada, azaldu du ez litzatekeela inolako interpretazio politikorik egin behar Elizaren jarreraren inguruan horrek "errealitatea distortsionatu" egiten duelako.

Munillak adierazi du bihotza "hautsi" egiten zaiola Palentziako elizbarrutia utzi behar izanagatik, baina "konfidantzaz eta apaltasunez" heltzen diola aro berri honi.

Jose Ignacio Munilla Juan Maria Uriarteren ordezkoa izango da. Uriartek 76 urte dauzka eta "adin kontua" argudiatuz karguari uko egin dio.