Gizartea

Euskal Herriko Gay, lesbiana, bisexual eta heterosexualen Elkarteak, Gehituk, sexuari buruzko eta har daitezkeen beste hainbat gaixotasuni buruzko informazio interesgarria bildu du nerabeei eta gazteei zuzendutako euskarazko gida berri batean.

Sergio Iñiguez Gehituko koordinatzaileak adierazi du elkarteko gazte talde bat Sexu seguruagoa izeneko liburuxka horren egilea dela eta, hortaz, "gazte jendearen lengoaiarekin idatzia dago eta diseinu erakargarria du".

Gidak 40 orrialde ditu eta sexua praktikatzerakoan drogak hartzeak duen eragina, emakumezkoen eta gizonezkoen sexu organoen anatomia, eta sexurako jostailuei buruzko informazioa biltzen duela azaldu du Iñiguezek.

Elkarteak 7.500 ale kaleratu ditu eta kanpaina honetan lelo bereko kartelak ere zabalduko dira. Horrez gain, www.sexuseguruagoa.com webgunean ere informazio gehiago topa daiteke.

Iñiguezek azpimarratu du gida horretan ere homosexualek Euskadin dituzten osasun baliabideei eta informazio eta laguntza guneei buruzko informazioa jasotzen dela.