Gizartea

EITBk Baionan egoitza izaten jarraituko duela esan du Aberto Surio hedabideko zuzendari nagusiak, "euskara indartzeko sorrera garaiko helburuari erantzuteko", eta gutxienez hiru kazetari ariko direla bermatu du.

EITBk Baionan (Lapurdi) duen korrespontsaliaren jarduerak 5,5 milioi euroko kostua izan du azken hamar urteetan, Alberto Surio EITBren zuzendari nagusiak jakitera eman duenez.

Surio Legebiltzarreko kontrol batzordean izan da gaur Aralarrek Baionako egoitzaren inguruan egin behar zizkion galderei erantzuteko.

Euskal Irrati Telebistaren zuzendari nagusiak esan du esleipen kontratua hilabete honetan amaituko dela eta eskaintza publikoa deituko duela egoitza mantenduko duen enpresa bat kontratatzeko.

Enpresa berri horrek egoitza "fundatu zuteneko" helburuari erantzun beharko diola argitu du, hau da, euskara sustatzea izango du helburu.

Suriok iragarri duenez, enpresa berriari dagokio langile kopurua zehaztea, baina eskaintzan agertuko den baldintzetako bat gutxienez hiru kazetari kontratazea izango da: bat ETBrentzat, beste bat Radio Euskadirentzat eta hirugarren bat Euskadi Irratiarentzat.

Era berean, astero 30 minutuko saio bat egitea edo egunero sei minutuko bat egitea exijituko diote enpresa berriari.

Zuzendari nagusiak esan du datozen asteetan deituko duela eskaintza publikoa eta enpresa bat kontratatzen dutenean jakingo dutela zer gertatuko den Lapurdiko bulegoko egungo bost langileekin.