Gizartea

Patata-ekoizpenaren inguruko ezagutza zientifikoa hedatzeko elkarteak, Newco izenekoak, airean lurrik gabe ereiten diren patatak ekoizteko proiektua jarri du martxan, Neiker-Tecnaliaren laguntzarekin. Patatak aeroponia izeneko sistema berritzaile bati esker lortzen dituzte, eta teknika horrek ekoizpena handitzen du; ohiko metodoa erabiliz landare bakoitzetik hiru edo lau patata lortzen zituzten, eta metodo berriaren bidez 20 inguru lor daitezke.

Horren arduradunek esan dutenez, sistema berriarekin landareek lurrean izan ditzaketen gaixotasunak ekidin eta ura eta ongarriak aurrezten dituzte. Estatu osoan egin den horrelako lehenengo esperientzia izan da honakoa.

Ekoizpen-mota berritzaile hau, aeroponia, negutegietan egiten dute, landareen sustraiak airean jarri eta iluntasunean edukita.

Landarea eta patata garatze aldera, langarreztapen sistema bat erabiltzen dute erpe edo sustraietan elikagaiak jartzeko, eta, noizean behin, elikagai batzuekin aberastutako ura botatzen diete. Patatak airean garatzeak sustraiak aireztatzea ahalbidetzen du eta lurrean egon daitezkeen patogenoak ekiditen ditu. Horrela, landareen ekoizpena handitu egiten da eta, ondorioz, baita patataren prezioa merkatu ere.

Horrez gain, ekoizpen eredu berriak erabili beharreko ur eta elikagaien kopurua murriztu egiten du. Gainera, aeroponiaren bidez, landareak bere garapenaren une bakoitzean behar dituen bi elikagai horien kopurua zehaztu dezakete eta, horrela, ekoizpen jasangarriagoa egiten dute.