Gizartea

Jose Maria Arbelaitz Donostiako Miramon jatetxearen jabeak 2010eko Euskadi Gastronomia golardoa eskuratu du, sukaldari eta jatetxe-jabe onenaren atalean. Gainera, Zigor Gutierrezek, Bilboko Etxanobe jatetxekoa, sari bera jaso du, jantokiko zuzendari onena izateagatik. Halaber, EITB ere saritu dute, kultura gastronomikoari buruz egindako dibulgazio lan onenagatik.

Gainera, Gastronomia Euskal Akademiak Donostiako Aste Gastronomikoari eman dio golardo berezia. Añanako Gatz Harana Fundazioak eta Bilboko Arbolagaña jatetxeko Ana Maria Larreak "Jose Maria Busca Isusi" eta "Manuel Llano Gorostiza" sariak lortu dituzte, hurrenez hurren. Gastronomia alorreko argitalpen onenaren aipamena "Pintxoa 2011" aldizkariarentzat izan da.

Urtero eman ohi ditu Eusko Jaurlaritzak golardo hauek, gastronomia alorrean ibilbide aipagarria izan dutenak saritzeko.