Gizartea

Rene Redzepi munduko sukaldari onenak Gasteizko Sukaldaritza Kongresu Nazionalean parte hartu du gaur. Sukaldariak "gastronautak" direla esan du Redzepik XVII. biltzarrean, izan ere, "ama-izadia esploratzen" dute. Bestalde, herrialde bakoitzeko elikagaiak kultura ondasuna direla defendatu du Redzepik.

Kongresuko txostenei hasiera eman ostean prentsaurrekoa eskaini du Redzepik. Danimarka toki "oso kultur anitza" dela azaldu du Noma jatetxeko sukaldariak eta herrialde ezberdinetako pertsonak beste leku batzuetan bizitzea "onargarria" dela defendatu du. Horrela, bertako bizilagunek jaioterri horietako jakiak probatzeko aukera dute. Thaildandiako eta Aljeriako jatetxeen adibidea goraipatu du Redzepik. Danimarkako gastronomiarekin gauza berdina egitea "arraro" suertatzeagatik harrituta agertu da.

Horregatik, sukaldari gisa jateko ekintzarekin esperimentatu nahi izan duela adierazi du Redzepik eta "produktuen jatorria baino, ulertzea beharrezkoa" dela defendatu du. "Ni munduaren esploratzaile bat naiz nire sustraietatik abiatuz, eta sukaldariak gastronautak garela uste dut, ama-natura esploratzen dugulako", adierazi du.

Arabako hiriburuan XVII. Kongresu Nazionala egiten ari dira sukaldariak eta Rene Redzepik parte hartuko du bertan. Gauean ''14 Michelin izar'' afaria eskainiko du munduko sukaldaririk onenak, Joan Roca, Martin Berasategi, Pedro Subijana, Quique Dacosta eta Patxi Eceiza lankideak lagunduta.

Zaldiaran jatetxea

Horrela, ''14 izarren afaria'' bilera gastronomikoa hartuko du gauean Gasteizko Zaldiaran jatetxeak.

Danimarkako sukaldariak aurreratu duenez, afarian zainzuriak plantxan pinu sortekin probatzeko aukera izango dute bezeroek, pinu olio eta ozpinarekin, eta ipuruaz lagundutako gari-zainzuriekin.