Gizartea

Euskal sukaldaritzak osasun ona izaten jarraitzen du. Horrela, Mugaritz jatetxea munduko hiru onenen artean kokatu da. Danimarkako Noma eta Kataluniako El Celler de Can Roca jatetxeek soilik gainditu dute zerrendan. Danimarkako jatetxeak lehen postuan errepikatu du berriro. Zerrenda Restaurant Britainia Handiko aldizkariak egiten du urtero.

Horrela, Joan Roca kataluniarraren eta Andoni Luis Aduriz euskal herritarraren sukaldeak bigarren eta hirugarren izan dira, hurrenez hurren, San Pellegrino sarietan. Sariak Restaurant aldizkariak antolatu ditu, izan ere, urtero munduko 50 jatetxe onenen zerrenda argitaratzen du.

San Pellegrino sariak sukaldaritzaren ''Oscar''ak dira eta Noma, Rene Redzepi sukaldariaren jatetxea, jarri dute berriro lehendabiziko postuan. El Bulli jatetxea zerrendako lehen postutik kendu zuen Danimarkako jatetxeak iaz. Era berean, Restaurant aldizkariak Adria azken hamarkadako sukaldaririk onena izendatu zuen iazko ekitaldian.

Restaurant aldizkariaren arabera, "Redzepik eskualdeko osagaiak erabiltzen ditu eta horrek erakarri egiten du".

2010eko sutearen ostean

Honenbestez, Mugaritz jatetxe gipuzkoarrak bi postu irabazi ditu (iaz bosgarren izan zen). Adurizek Errenteriako baserri batean duen jatetxeak 2010eko sutea gainditu duela demostratu du.

Adurizek 40 urte ditu eta bere eskaintza gastronomikoa euskal sukaldaritzaren eta munduko gastronomiaren erreferentzia bihurtu da.

Arzak

Bestalde, Arzak jatetxeak postu bat irabazi du eta zortzigarren postuan kokatu da. Juan Mari Arzak beteranoaren ibilbidea saritu du Restaurant aldizkariak.