Gizartea

Elena Arzakek, Juan Maria Arzak sukaldariaren alaba, eta Pepe Rodriguez Reyek Espainiako Gastronomia Akademiak ematen dituen 2010eko sukaldari onenaren Gastronomia Sari Nazionala irabazi dute.

Donostiako Arzak familiako jatetxean ari da lanean Elena (hiru Michelin izar). Pepe Rodriguez Rey, berriz, Yllescasen (Toledo) kokatutako El Bohio jatetxearen buru da (Michelin izar bakarra).

Gela arduradun onenaren saria Errenteriako Mugaritza jatetxeko Jose Ramon Calvorentzat izan da (bi Michelin izan ditu). Sommelier onenaren golardoa Celler de Can Roca jatetxearen Josep Rocari eman diote. Gironako jatetxe honek hiru Michelin izar ditu eta "Restaurant" aldizkari britainiarraren arabera, munduko bigarren jatetxerik onena da.

Gainera, Gastronomia Akademiak aparteko sari bi eman dizkio David Seijas eta Ferran Centelles El Bulli jatetxearen sommelierrei. El Bullik uztailean itxiko ditu ateak, izan ere, hemendik bi urtetara eta fundazio bat bihurtuta, irekiko baitute berriro.

El Pais egunkariko Rosa Rivas kazetariak 2010eko kazeta lanik onenaren golardoa eskuratu du eta argitalpenei dagokionez, Valentin Fusterrek, Ferran Adriak eta Josep Corbellak idatzitako "La cocina de la salud" liburuari eman diote aipamen bat.

Halaber, iaz gastronomia munduan izandako pertsona nabarmengarriena izendatu dute Jose Andres espainiar sukaldaria. Duela gutxi, gainera, Urteko Sukaldariburu Onena ere izendatu zuen AEBetako James Beard Fundazioak.