Gizartea

Baltasar Garzon epailea Auzitegi Goreneko akusatuen aulkian eseri da azken asteetan, Frankismo garaiko hilketak ustez eskumenik gabe ikertzea leporatuta. Auzia epairako prest geratu da. Azken saioan Garzonek, "kontzientzia lasai" duela azpimarratu du, "hilketa masiboak zigortzeko eta epaitzeko" zuzenbidean jasota dauden erabakiak hartu zituela iritzi dio.

Epaileak Enmanuel Kant filosofoa aipatu du azken hitzaren txandan, "gizonaren epaimahaia bere kontzientzia da" esan du, eta frankismo garaiko hilketak ikertzeko arau prozesalak bete zituela azpimarratu du.

"Nire kontzientzia lasai dago zuzenbideak jasotzen dituen erabakiak hartu nituelako, hilketa masiboak, desagertzeak eta legez kanpoko atxiloketak ikertzea, jarraitzea eta zigortzea (...) erakundeek biktimei zor dieten defentsa soil gisa, ahanzturarik eta memoriaria faltarik sor ez dadin", esan du Garzonek.

Auziaren eskumena hartu zuen bitarte guzti horretan erabakitakoa aldeekin eta fiskalarekin partekatu zirela adierazi du, eta bi urte horietan, 2006an salaketak aurkeztu zirenetik, ez zela helegiterik ipini adierazi du.

Manos Limpias eta Libertad e Identidak elkarteek 20 urterako inhabilitatzea eskatzen dute Baltasar Garzon epailearentzat; Fiskaltzak eta defentsak, aldiz, absoluzioa.

NBEko kontalaria

Nazio Batuen Erakundeko kontalari baten hitzetan, Baltasar Garzon epailea Gerra Zibilean eta Frankismoan izandako giza eskubideen bortxaketen inguruan zabaldutako ikerketagatik zigortua izatea "deitoragarria" da.

Gabriela Knaul epaileen eta abokatuen independentziari buruzko NBEko kontalari bereziak eta beste bost aditu independentek azaldu dutenez, "Espainiak ikertzeko beharra duen delituengatik Baltasar Garzon epailea zigortu ahal izatea deitoragarri da".