Gizartea

2011n 8.376 zirkulazio istripu gertatu ziren Euskal Autonomi Erkidegoan, 2.502 biktima eraginez. Datu horiek, 2010ekoekin alderatuz, % 1,5eko jaitsiera islatzen dute istripu kopuruan, eta % 11,5eko jaitsiera inplikatutako pertsona kopuruan.

Hildakoei dagokienez, 2011an 60 pertsona izan ziren trafiko istripu baten ondorioz momentuan edota lehen 24 orduak igaro baino lehen zendu zirenak. 2010ean, berriz, hildakoak eragin zituzten istripu kopuru berdina izan zen, baina urte horretan 7 pertsona gehiagok galdu zuten bizia.

Datu hauek Amparo Lopez Eusko Jaurlaritzako Trafiko zuzendariak aurkeztu ditu, Suediako Enbaxadak bideko segurtasunaren inguruan antolatutako jardunaldi batean.

Hildakoak eragiten dituzten istripuei dagokienez, Euskadin azken hamarkadan zenbaki hori % 42,5 jaitsi izana jarri du adibide gisa Lopezek. Datu horiek Euskadik eginiko Estrategia Planean aurreikusitako emaitzak hobetzen dituztela gaineratu du.

Etorkizunean

Euskadiko istripuen ezaugarriak aztertu ondoren, Lopezek azaldu du oso zaila izango dela datu hauek etorkizunean mantentzea, zenbatekoak oso baxuak direlako.

Datozen urteetan emaitza positiboak izaten jarraitzeko neurri berriak ezarri beharko direla adierazi du, puntu bidezko gidabaimenaren antzekoak.

Hobera egiteko hainbat gauza aipatu ditu. Hitz gutxitan esanda, gidariei ez zaie arau-hausterik barkatuko eta zirkulazio arauak bete beharko dira.