Gizartea

Logroñoko (Errioxa) 58 urteko gizonezko bat hil da bart, Mendabian (Nafarroa), autoarekin traktore baten atoia jota, Nafarroako Gobernuak jakitera eman duenez.

Ezbeharra atzo izan zen, 22:50 aldera, NA-134 errepideko 87. kilometroan. Logroñora bidean zihoan autoak Mendabiako herritar bat gidatzen ari zen traktorearen atoia jo zuen.

Traktorearen gidaria ez zen zauritu ere egin, baina auto-gidaria bertan hil zen. Nafarroako larrialdi zerbitzuetako langileek biktima suspertzeko egindako ahaleginak alferrikakoak izan ziren.

Gobernuak azaldu duenez, gizonaren gorpua ibilgailuaren barrutik atera behar izan zuten Lodosako suhiltzaileek eta gero Nafarroako auzitegi-medikuarenera eraman zuten hilotza.