Gizartea

Ertzaintzak 21 urteko gizon bat atxilotu du astelehen honetan adingabe batek Lagako hondartzan (Ibarrangelu) jasandako ustezko bortxaketaren harira. Erasoa igande gauean gertatu zen, hondartza horretan ‘madalenak’ ospatzeko urtero egiten den festan.

Eusko Jaurlaritzako Herrizaingo Sailak atxilotu bat dagoela onartu du, baina kasuaren eta tartean dauden pertsonen inguruko datu gehiago ematea baztertu dute, erasoa adingabeko pertsona batek salatu baitu.

Iturrien arabera, Gernikako gaztea bere amarekin aurkeztu zen Poliziaren aurrean, eta harremanak baimendutakoak izan zirela azaldu zuen.

Atxilotua epailearen aurretik pasatzeko zain geratu da.

Eskualde horretan bi astetan salatutako bigarren sexu erasoa izan da honako hau, Busturiko San Kristobal auzoko jaietan, hilaren 7an, Ertzaintzak 35 urteko gizon bat atxilotu zuelako emakume baten kontrako eraso bategatik.