Gizartea

Marten lurreratu, zuri beltzean lehen argazkia bidali eta hurrengo egunean, dagoeneko koloretan ateratako lehen argazkia bidali du Curiosityk.

Marte iparraldeko irudi hau Mars Hand Lens Imager (MAHLI) kamerak hartu du. Ibilgailuaren beso robotikoan jarritako kamera da eta arroken eta Marteko lurraren irudi mikroskopikoak lortzeko balio du.

Argazki honetan iparraldeko horma eta Gale kraterraren ertz bat ikus daiteke, nahiz eta nahiko lausoa den, izan ere, robota lurreratzean estaldura kaltetu egin da. Datozen asteetan, hala ere, estaldurarik gabeko irudiak hartzea espero da.

Hurrengo bi urteetan, robotak espedizio geologikoa egingo du Gale kraterrean, Sharp mendian (Marteko ekuatorearen hegoaldea). Zientzialarien ustez, krater hori duela 3.500-3.800 milioi urte sortu zen, hots, Martek, Lurrak eta Eguzki sistemako gainerako planetek meteorito bonbardaketa handiak jasotzen zituzten garaian.

Curiosityk bidalitako argazkiak NASAren webgunean ikus daitezke.