Gizartea

Bakioko Udalak bikote batek goizaldean jasandako erasoa gaitzetsi du. Ohar baten bitartez, bi biktimen senitartekoei elkartasuna adierazi die.

18 urteko neska gazte bat oso larri dago eta 17 urteko bikotekideak ere zauriak ditu, goizaldean labankada bat jaso ostean, Bakion (Bizkaia), Herrizaingo Sailak jakitera eman duenez.

04:30etan gertatu da erasoa, bat-batean gizonezko batek bikoteari eraso egin dionean Bakio eta Bermeo batzen dituen errepidetik zihoazela. Bikotearen lagunek ETBri egindako adierazpenen arabera, biktimei gizon bat gerturatu zaie eta tabakoa eskatu die. Tabakorik ez zutela esan diotenean, erasotzaileak labana atera du eta neskari sastada eman dio.

Neska oso larri dago eta Gurutzetako ospitalera eraman dute, Barakaldora. Mutilak ere zauriak ditu, baina ez dago hain larri eta Basurtuko ospitalera eraman dute.

San Pelayo auzoan

Bakioko San Pelaio auzoan gertatu da erasoa, bertako ur-araztegiaren parean. Ertzaintza gertatutakoa ikertzen eta erasotzailea bilatzen ari da.