Hondurasen gertatutakoa, begiratzen zaion aldetik begiratuta, estatu kolpe bat da. 2005ean demokratikoki aukeratutako presidentea, Manuel Zelaya, indarkeriz kendu dute kargutik militarrek.

Egia da, Zelaya abentura politiko batean sartu zela, konstituzioaren erreforma bati buruz herritarren iritzia ezagutzeko erreferenduma egin nahi zuelako. Kontsulta legez kanpo utzi zuen Auzitegi Nagusiak, eta ez zuen, ez parlamentuaren eta ezta Zelaya beraren Alderdi Liberalaren babesik.

Honen aurrean, legezko prozedura, parlamentuak presidentea kargutik kentzeko tramitea martxan jartzea izango litzake; militarren eskuhartzea ordea legez kanpokoa da, eta arazoa Estatu Kolpe batera murrizten du.

Latinoamerikan Estatu kolpe hauek ahaztuta daude, baina pasa den mendean, 70 eta 80 garren hamarkadetan ohikoak ziren. Orduan gainera, militarren Estatu Kolpe gehienak Estatu Batuen babesa zuten.

Horregaitik zen hain garrantzitsua oraingo honetan Obamaren erreakzioa. Estatu Batuetako presidenteak azkar erreakzionatu du. Nahiz eta oso sendoa ez izan, orohar, legea eta arau demokratikoak errespetatzeko deia egin du. Bere Estatu idazkariak, Hillary Clintonek bai, Estatu kolpea irmoago gaitzetsi du.