Mundua

Barack Obama AEBetako presidenteak beti esan du bere lehentasun estrategikoak Afganistan eta Pakistan direla eta Bushek huts egin zuela Iraken horrenbeste denbora galduz. Horrela ba, marine estatubatuarrek abiatutako erasoa guztiz bat dator ikuspegi estrategiko horrekin.

Afganistanen datorren hiletan egitekoak diren hauteskundeak ahalik eta normaltasun handienean egitea nahi dute AEBek eta bere kideek, eta horretarako ahuldu egin behar dituzte hauteskundeei boikota egin nahi dieten talibanak.

Horretarako Pakistanekin muga egiten duen Helmand probintziatik hastea erabaki dute, gaur egun ia erabat talibanen esku dagoena.

Soldatu britainiarrak eta afganiarrak barne dituen ofentsiba horrek badu arriskurik.

Lehenengoa talibanei borroka ez irabaztea. Hauek, amerikarren etorreraren aurrean, betikoa egingo dute: ezkutatu egingo dira... edota Pakistango lurraldean dagoen Baluchistanera joango eurak baino indartsuago direnekin zuzeneko aurrez aurrekoa saihesteko. Baina, aliatuek Helmand bereganatzean, talibanek atentatu suizidak eta sarekadak egiteari ekingo diote.

Beste arrisku nagusia zera da, amerikarrek biktima zibilak eragitea, behin baino gehiagotan gertatu dena. Horrek beti ekarri du herri estatubatuarren irudia zikintzea.

Nola nahi ere, eraso honek argi eta garbi utziko du Obama serio ari dela eta dena emango duela bere estrategiak emaitza onak izan ditzan.