Mundua

Amerikako Estatuen Erakundeko burua, Jose Miguel Insulza Hondurasera abiatuko da estatu kolpearen ondoren sortutako krisiari irtenbidea aurkitu nahian.

Konponbide negoziatua lortzeko azken aukera izan liteke, izan ere, estatu amerikarrek emandako epea bihar amaituko da.

Nazioarteak gogor estuturik, Roberto Micheletti behin-behineko presidenteak aitortu egin du azaroko hauteskundeak aurreratzea konponbide politiko baten abiapuntua izan litekeela..

Bien bitartean, joan den igandeko estatu kolpearen ondoren, Hondurasen ezarritako etxeratze aginduak ez du lortu Manuel Zelaya presidente kargugabetuaren aldekoen protestak itzaltzea.

Atzo gutxienez manifestari bat balaz zauritu eta beste 80 bat atxilotu zituzten San Pedro Sula iparraldeko hirian izandako manifestazioan.

Manuel Zelaya presidente hautetsia El Salvadorrera heldu da, eta Farabundo Marti fronte ezkertiarreko kideek harrera beroa egin diote.

Zelayak kalean era baketsuan protestan jarraitzera dei egin die Hondurasko herritarrei.