Mundua

Hamid Karzai Afganistango presidente hautetsiak herrialde osoko ordezkariekin Gobernu integratzailea eratzea promestu du gaur goizean, presidente izendatu zutenetik egindako lehen agerraldi publikoan.

Hauteskunde Batzordeak haren garaipena berretsi zuen atzo, Abdula Abdula aurkariak bigarren itzulian parte hartzeari uko egin baitzion. Izan ere, oposizioko buruak salatu zuen lehen itzulian izan zen iruzurrak "bere horretan" jarraitzen duela.

"Nire Gobernua batasun nazionalekoa izango da. Etorri nahi duen edozein pertsona ongietorria izango da", esan du presidenteak Presidentetzaren Jauregian eskainitako prentsaurrekoan.

Karzaik Abdulari eta talibanei ere egin die Gobernuan sartzeko eskaintza.

Oposizioko buruak isilik jarraitzen du, baina haren taldeko kide batek esan du presidente hautetsiak ez duela zilegitasuna.

Karzaik ustelkeriaren aurka borroka egitea ere agindu du bere hitzaldian.

Talibanek ezezkoa eman diote

Beren aldetik, talibanek errefusatu egin dute Karzairen izendapena, eta herrialde osoan eraso egiten jarraituko dutela ohartarazi dute, "etsaiaren konspirazio guztiak zapuzteko" helburuz.

"Duela bi aste, Karzaik iruzur egin zuela eta boto gehienak faltsuak zirela esan zuten, baina halere irabazle izendatu dute, hauteskunde horiek oinarri hartuta", adierazi dute AIP agentzia afganiarrak zabaldu duen agiri batean.

Obamak presidente bezala aintzatetsi du

Bestalde, Barack Obama AEBetako presidenteak Afganistanen "atal berria" hasteko unea dela esan zion atzo Karzairi, ustelkeria.

Presidente estatubatuarraren ustez, hauteskunde prozesua "nahasgarria" izan da, baina emaitzarekin "pozik" agertu da, "Afganistango legearen arabera" ezarri baita.

Obamak hitz egin baino lehen, Etxe Zuriak nabarmendu zuen Karzai Afganistango presidente "zilegia" dela, Abdulak "arrazoi pertsonalak eta politikoak" tarteko erabaki baitzuen ez parte hartzea.