Mundua

Radovan Karadzic serbobosniar presidente ohia Hagako Auzitegian aurkeztu da gaur. Bosniako gerran (1992-95) ustez gauzatutako hamaika gerra krimenengatik epaitzen ari dira; Srebrenicako genozidioagatik, besteak beste. Beraz, Karadzicek orain arte egindako boikota eragotzi du, aldi baterako bada ere.

64 urteko Karadzicek bere burua babesten du epaiketan eta defentsa prestatzeko hamar hilabete behar zituela argudiatu zuen epaitegira ez joateko arrazoi moduan.

Radovan Karadzicen bi lege-aholkularik atzo jakinarazi zutenaren arabera, buruzagi serbiar-bosniarra Hagako Auzitegian izango zen gaur eta horrela izan da.

"Arazoari irtenbidea eman nahi diolako egongo da bihar (gaur)" Epaitegian, azaldu du Marko Sladojevicek, Karadzicen lege aholkularietako batek. "Auzitegiak epaiketa prestatzeko behar dugun denbora emango digula espero dugu. Hamar hilabete behar ditugula pentsatzen dugu eta hori da gure eskakizun bakarra", gaineratu du.

Epaitegiak egoerari irtenbidea emateko modua aztertuko du, eta aukerak hiru izan litezke: Karadzic egon gabe epaiketarekin jarraitzea, ofizioko abokatua jartzea edo prozesua atzeratzea defentsa prestatzeko denbora emate aldera. Hala ere, Sladojevicek aurreikusi zuen litekeena dela Karadzicek ez hitz egitea ezarritako abokatu batekin.