Mundua

Barack Obamak ezinbestekoa zuen presidente ezberdina izatea. AEBetan nahiz atzerrian, inor gutxi iritsi zen Presidentetzara hainbeste ilusio aldean zuela.

Mundu guztiak espero zuen zerbait egitea, eta arin egitea, gainera. Hortxe nahasten ziren jendearen nahia eta errealitatea. Azken finean, Obama AEBen interesak defenditzeko hautatu zuten presidente, eta hori horrela, ezinbestekoa du besteak bezalakoxe presidente izatea.

Baina egia esan, ausartago izan zitekeen zenbait arlotan. Aseguru Sozialaren erreforman, aldaketa funtsezkoagoa proposatu zezakeen, baina tematu da akordioa iristen errepublikanoekin, eta horrek aukera eman die erreforma indargabetzeko.

Iraketik erretiratzea arinago egin zezakeen, baina 2012 urtera atzeratu du, hori baita Bushek iragarria zuen epea.

Afganistanen, dagoeneko hartua behar zuen erabakia, soldadu gehiago bidali edo gauzak bere horretan utzi behar diren, eta hor ari da oraindik zalantzan.

Guantanamoko aferean eta CIAren torturak direla eta, arduradunak auzitara eraman zitzakeen, baina salatu gabe uztea erabaki du.

Horrek guztiak etsipena ekarri dio jarraitzaileetako askori eta ilusioa desegin da. Baina Obamari oraindik denbora luzea geratzen zaio Presidentetzan eta gai horietan denetan bide zuzenean doa oraingoz, nahiz ibilera mantsoa izan.