Mundua

Barack Obama AEBetako presidenteak Shanghaiko unibertsitatean, ikasle txinatarren aurrean, egindako agerraldi batean adierazpen eta partehartze askatasuna aldarrikatu ditu balio unibertsal moduan.

Txinako finantza hiriburuko Zientzia eta Teknologia Museoan adierazi duenez, "ez ditugu balio horiek inposatu nahi, baina ez dugu uste herrialde bakar batenak direnik. Eskubide unibertsalak dira".

Txinan zehar egingo duen hiru eguneko bidaiaren lehenengo jardunaldian, AEBetako presidenteak esan du bi herrialdeek (Txina eta AEB) ezin dutela etsaiak izan, lankidetza sustatu behar dutela, arma nuklearrak ugaritzea eta aldaketa klimatikoa saiheste aldera.

"AEB eta Txina ados ez badaude, nazioarteko oso arazo gutxi konpon litezke", Obamaren esanetan.

Tokion iragan larunbatean eman zuen hitzaldiaren antzera, AEBetako presidenteak argi adierazi nahi izan du ez duela Txinaren "susperraldia" eten nahi, kontrakoa baizik, ongietorria eman nahi diola Errepublika Popular "indartsu eta oparoari".

Asteazkenean Hu Jintaorekin bilduko da

Ekonomia eta negozioak izango dira Obamaren hizpide nagusiak Txinako agintariekin izango dituen bileretan. Hu Jintao presidentearekin asteazkenean bilduko da, hirugarren aldiz aurten.