Mundua

Barack Obama AEBetako presidenteak eta Hu Jintao Txinakoak, elkarlana areagotzeko konpromezua sendotu egin dute. Hala ere, agerian geratu dira herrialde biek giza eskubideak edo energia nuklearraren sustapena bezalako gaietan, iritzi erabat ezberdinak dituztela.

Agintari biak gaur goizean bildu dira (Espainiako goizaldean) Pekinen eta besteak beste, ekonomia, aldaketa klimatikoa, giza eskubideak eta energia nuklearraren erabilpenaz mintzatu dira.

Giza eskubideak

Obama giza-eskubideen inguruan aritu da Txinako agintariarekin, eta presidente biek hedabideen aurrean egin duten agerraldian esan duenez, "giza-eskubide guztiak gizaki eta talde gutxitu guztientzat bermatu behar dira".

Horren harira, AEBetako presidenteak Txinari ahalik eta arinen Dalai Lamarekin harremana berreskuratzea galdegin dio.

Ipar Korea eta Iraneko programa nuklearrak

Agintari biak Ipar Korean eta Iranen dituzte programa nuklearren inguruan ere aritu dira.

Horren harira, Pyingyangi eskatu diote "ahalik eta arinen" berriz ere euren programa atomikoaren inguruan erabakiak hartzeko mahaian esertzea.

Obamak Iranen inguruan esan du Errepublikak bere programa nuklearrak helburu bakezaleak dituela berretsi ezean, "ondorioak" izango dituela.

Aldaketa klimatikoa

Presidente biek azpimarratu dute datorren abenduan Copenhaguen aldaketa klimatikoaren aurka izango den bileran arrakasta lortu nahi dutela.

Txina eta AEB dira energia gehien sortu eta kontsumitzen duten herrialdeak eta baita gas kutsatzaile gehien isurtzen dituztenak ere. Bada, Obamak adierazi du akordioa babesten duten herrialdeek "berehalakotasunez" erantzun behar dutela eta Lars Lokke Rasmussene Danimarkako lehen ministroak esan duenez, arazoaren alor guztiak jorratu behar dituela.